He maha ngaa whakaaro a teenaa, a teenaa, heoi, ki ahau nei, ko te wairua te orokohanga o tooku oranga. Ki te kore, ki te ngaro raanei tooku wairua, ka ahatia ahau? Ahakoa ngaa piki me ngaa heke o tooku wairua, kei reira tonu te hiranga o te wairua. Ko tooku wairua te tohu o tooku tuakiri. I ngaa waa e itiiti noa te wairua, ko eetahi o aku mahi whakaikeike wairua he puta ki waho ki ngaa hau e whaa o Tawhirimaatea, ki reira rongo atu i toona hau, he hiikoi i ngaa ngahere, rongo ai i a Taane Maahuta i ngaa raakau, i ngaa manu, he kaukau i te moana, rongo ai i a Tangaroa, i ngaa ngaru, i ngaa kirikiri, he hoki atu ki ooku Tuurangawaewae, rongo ai i ooku tiipuna. Ko eetahi atu, he haere ki te whare pakari tinana hei whakapiki i tooku hauora, tooku mauri, waihoki ko tooku wairua. Ko te noho ki te taha o taku whaanau, ooku hoa, te paanui pukapuka, te koorero Maaori, te noho hoki i tooku Ao Maaori. Eengari, me kaha te wairua o taku whaanau. Ki te noho pouri teetahi o aku tamariki, ki te whakatooririki too raatou ake wairua, ka whakatooririki tooku ake nei hoki. Naa reira, ko taaku, he kaha akiaki, he kaha whakamanawa i a raatou kia uu ki ngaa mahinga whakapiki wairua, aa, kia wairua riiraa te whaanau katoa. Heoi, ko te mea e tiino hikina tooku wairua ko ooku mahi whakapono ki a Ihu Karaiti. Araa, te iinoi, te paanui i te paipera tapu, te haere ki te whare karakia, te whakarongo ki nga waiata karaitiana hoki. Maa te kotahitanga o eenei mea kaatoa tooku wairua e noho pai ai.
Ana Nolan-Neketai
He uri naa Waikato, Tapuika, Kotimana
BA double majoring in Psychology and Māori Studies
Third-year, Undergraduate
Comments